Rev 11 | JAE | STEP | Go sêkêŋ ôpic teŋ kêtôm tôc tanam dôŋ gêŋŋa gêdêŋ aê ma sêsôm gêdêŋ aê gebe “Ôndi naônam dôŋ Anôtônê lôm dabuŋ to altar ma êsêac, taŋ teteŋ mec sêmoa lôm dabuŋ ŋalêlôm naŋ.

Revelation of John 11

Sêwa-biŋ-sa-ŋaŋeŋwaga luagêc

1 Go sêkêŋ ôpic teŋ kêtôm tôc tanam dôŋ gêŋŋa gêdêŋ aê ma sêsôm gêdêŋ aê gebe “Ôndi naônam dôŋ Anôtônê lôm dabuŋ to altar ma êsêac, taŋ teteŋ mec sêmoa lôm dabuŋ ŋalêlôm naŋ. 2 Mago ondec malacluŋ lôm dabuŋ ŋamagêŋa ênêcŋa, ônam dôŋ atom, gebe sêkêŋ gêdêŋ lau samuc sêwê kaiŋ ma êsêac oc sêka malac dabuŋ popoc êtôm ajôŋ 42. 3 Ma aê oc jakêŋ ŋoc sêwa-biŋ-sa-ŋaŋeŋwaga luagêc. Êsêagêc sêsô talu sa ma seoc biŋ lasê êtôm bêc 1,260.” 4 Ŋac ulu tonaŋ têtôm katêkwi luagêc me jakaiŋ luagêc, taŋ sêkô nom Ŋatau laŋônêm naŋ. 5 Ma teŋ embe taê ênam gebe êtu kasec êsêagêc, go ja êsa êsêagêc aweŋsuŋ e naêniŋ agêcnêŋ ŋacjo su. Teŋ embe taê ênam gebe êtu kasec êsêagêc, naŋ senseŋ eŋ su ŋa ja êtôm tônêgeŋ. 6 Ŋaclai gêdêŋ êsêagêc gebe sêmbôc umboŋ auc e kom teŋ ênac êndêŋ bêc êsêagêc seoc biŋ lasêŋa atom. Ma ŋaclai gêdêŋ êsêagêc gebe sênam bu ôkwi êtu dec. Ma êsêagêc oc sêlênsu nom ŋa gêŋwapac tokaiŋ-tokaiŋ êtôm taŋ taêŋ gêjam naŋ.

7 Êndêŋ taŋ sênac dabiŋ nêŋ kôm sêwa biŋ saŋa naŋ, bôc tau oc êpi aŋga ŋakêlêndiŋ sec mêŋênac siŋ êndêŋ êsêagêc e êku êsêagêc tulu ma ênac êsêagêc êndu. 8 Ma êsêagêcnêŋ ŋawêlêlaŋ oc ênêc malacsêga ŋaintêna. Êsêac sêlêwiŋ malac tau gebe Sodom to Aiguptu. Aŋga malac tonaŋ êsêac sêjac êsêagêcnêŋ Apômtau kêpi kakesotau. 9 Ma lau aŋga lau to-m-to-m ma lau tomôkê-tomôkê to lau aweŋ teŋ-aweŋ teŋ ma lau totoŋ-totoŋ sêlic êsêagêcnêŋ ŋawêlêlaŋ ênêc êtôm bêc têlêac ma ŋasêku ma sênac jao gebe sênsuŋ atom. 10 Ma lau nomŋa oc têtu samuc êsêagêc sêmac ênduŋa ma têntac ŋajam, tec sêkêŋ gêŋ ŋajam-ŋajam ŋaômageŋ êndêŋ tauŋ, gebe propete luagêc tonaŋ sêlêsu lau nomŋa. 11 Bêc têlêac ma ŋasêku gêjaŋa, go Ŋalau mata jaliŋa aŋga Anôtônê kêsêp êsêagêcnêŋ ŋalêlôm gêja, tec agêc dêdi sêkô, ma êsêac, taŋ sêlic êsêagêc naŋ, têtêc tauŋ ŋanô. 12 Ma ŋaclagêc tau sêŋô awa kapôêŋ kêsa aŋga undambê ma kêsôm gêdêŋ êsêagêc gebe “Api tonec amêŋ.” Go tao teŋ kêsuŋ êsêagêc sa sêpi undambê sêja ma agêcnêŋ I acjo sêlic êsêagêc sêpi sêja. 13 Ma gêdêŋ ŋasawa tonaŋ ôjô gêjam kapôêŋ e malac tonaŋ ŋaandu samob embe tawa êkôc êna toŋ 10, naŋ ŋateŋ gêjaŋa. Ma ôjô tau geseŋ lau 7,000 su. Ma lau ŋagêdô têtêc tauŋ, tec tetoc Anôtô undambêŋa sa.

14 Ojae kêtu luagêcŋa tec mêŋgêja su. Ma ojae kêtu têlêacŋa oc mêŋêsa.

Dauc kêtu 7ŋa

15 Go aŋela kêtu 7ŋa gêjac dauc kêtaŋ. Ma aweŋ kapôêŋ kêsa aŋga undambê gebe

“Aêacnêŋ Apômtau agêc nê Kilisi têtu nom ŋagamêŋ Ŋatau,
ma eŋ oc ênam gôliŋ êmoa teŋgeŋ ma teŋgeŋ.”
16 Go laumata 24, taŋ sêŋgôŋ nêŋ lêpôŋ sêmoa Anôtô laŋônêm naŋ, sêu tauŋ têtap labôcgeŋ sêc ma teteŋ mec gêdêŋ Anôtô gebe

17 “O Apômtau Anôtô, ŋaniniŋ Ŋatau, taŋ gômoa gêdêŋ andaŋgeŋ ma galoc gômoa naŋ,
aêac anam daŋge aôm gebe kôwaka nêm ŋaclai kapôêŋ sa ma gôjam gôliŋ gômoa.
18 Lau samuc têntac ŋandaŋ kêsa,
mago aôm têmtac ŋandaŋ kêsa amboac tonaŋgeŋ.
Noc ômêtôc ŋacmatêŋa
to ôkêŋ ŋagêjô ŋajam êndêŋ propete, taŋ têtu nêm sakiŋwaga
to êndêŋ nêm lau ma êndêŋ êsêac lau sauŋ to kapôêŋ,
taŋ têtêc aômnêm ŋaê naŋŋa, mêŋgêô lasê.
Noc onseŋ êsêac, taŋ seseŋ nom naŋ, tau tonec.”
19 Ma Anôtônê lôm dabuŋ aŋga undambê ŋakatam gêlêc su e Anôtônê poac ŋakatapa, taŋ kêkô ênê lôm dabuŋ naŋ, kêtu awê. Go ôsic kêkac to gamêŋ ŋakicsêa kêsa ma wapap gêjac to ôjô gêjam ma kompoc gêjac kapôêŋ.